Бугун Ўзбекистон Республикаси Коррупцияга қарши курашиш агентлиги томонидан  “Минтақавий диалог” халқаро нодавлат ташкилотининг Ўзбекистондаги филиали ва “The Boston Globe” (АҚШ) газетаси таҳририяти билан ҳамкорликда “Давлат органларининг шаффофлигини таъминлашда ҳамда коррупцияга қарши курашишда ОАВ ва ННТларнинг роли” мавзусидаги тренингда ташкил қилинди.

Тренингда оммавий ахборот воситалари ва нодавлат нотижорат ташкилотлар вакиллари, блогерлар, Коррупцияга қарши курашиш агентлиги ҳузуридаги Жамоатчилик кенгаши аъзолари ҳамда кенг жамоатчилик вакиллари иштирок этдилар.  

Анжуманни кириш сўзи билан Ўзбекистон Республикаси Коррупцияга қарши курашиш агентлиги директорининг ўринбосари Умида Тухташева ва “Минтақавий диалог” халқаро нодавлат ташкилотининг Ўзбекистондаги филиали бошлиғи Петра Горжуп очиб бердилар.

“Ўзбекистонда давлат органларининг шаффофлигини таъминлашда ҳамда коррупцияга қарши курашишда ННТ ва ОАВларининг иштироки: амалиёт ва истиқболдаги режалар” мавзусида Ўзбекистон нодавлат нотижорат ташкилотлар миллий ассоциацияси раиси, Коррупцияга қарши курашиш агентлиги ҳузуридаги Жамоатчилик кенгаши раисининг ўринбосари Камолиддин Ишанходжаев маъруза қилди.

“The Boston Globe” (АҚШ) газетаси муҳаррири, АҚШ Олий суди ҳузуридаги ОАВ ва суд ҳокимияти алоқалари бўйича қўмитасининг аъзоси Рашель Коэн  икки қисмдан иборат “Давлат органларининг шаффофлигини таъминлашда ҳамда коррупцияга қарши курашишда ОАВ ва ННТларнинг роли” мавзусидаги маърузасида коррупция ҳақида маълумот берувчи шахслар ҳимояси, коррупциявий ҳолатлар ва айбсизлик презумпцияси, коррупцияга оид журналистик суриштирувда касб этикаси ва қонун устуворлиги балансини сақлаш масалалари, коррупция ҳақида ОAВ орқали хабар беришдаги журналистик стандартлар ва муаммолар; Ҳукумат, жамият ва ОAВ: коррупцияга қарши кучли жамоатчилик назоратини ўрнатишда уларнинг олдида турган мажбурият ва талаблар; ННТларнинг коррупцияга қарши курашишдаги ташкилий салоҳияти ва тажрибасини кучайтиришга қаратилган стратегиялар; коррупцияга қарши курашда ННТлар, давлат органлари ва хусусий сектор ўртасида ҳамкорлик алоқаларини қандай йўлга қўйиш ва ундан фойдаланиш бўйича илғор тажрибалар ва бошқа масалаларни ёритиб берди.

Тренингда маърузаси иштрокчиларнинг кўплаб саволларига батафсил жавоблар берди. Унда тренинг самарадорлиги тўғрисида иштирокчилар ўртасида аноним сўровнома  ўтказилди.

Мазкур тренингда Ўзбекистон Республикаси Коррупцияга қарши курашиш агентлиги ҳузуридаги Жамоатчилик кенгашининг раиси, Ўзбекистон Республикаси Судьялар олий кенгаши ҳузуридаги Судъялар олий мактаби профессори, юридик фанлар доктори Фозилжон Отахонов иштирок этди.

Тренинг якунида иштирокчиларга тантанали равишда сертификатлар топширилди.