Тошкентда бўлиб ўтаётган Парламентлараро иттифоққа аъзо давлатлар парламентлари аёл раҳбарларининг 14-саммити иши самарали давом этмоқда. Унда иштирок этаётган Россия Федерал Мажлиси Федерация Кенгаши раисининг ўринбосари Галина Карелованинг саммит ҳақидаги фикрлари билан ўртоқлашдик.

 - Сўзим аввалида, самимий ва меҳмондўст ўзбек халқини, Президент Шавкат Мирзиёевни яқинда бўлиб ўтган энг улуғ байрам - Ватанингиз мустақиллигининг 31 йиллиги муносабати билан табриклайман.  Форум ташкилотчиларига мазкур анжуманни энг юксак савияда ташкил этгани учун миннатдорлик билдираман. Биз ўзбек халқининг меҳмондўстлиги, бағрикенглигини жуда қадрлаймиз.  

Бугунги саммитда кўтарилган мавзулар ўта долзарб ва аҳамиятли. Маълумки, ушбу саммитнинг асосий мақсади  - COVID-19 пандемияси ва у билан боғлиқ инқироз оқибатларини ҳисобга олган ҳолда барқарорлик ва фаровонликни, гендер тенгликни самарали таъминлаш ҳамда хотин-қизларнинг ҳуқуқларини кенгайтириш бўйича парламентлар фаолиятининг устувор йўналишлари ва ҳаракатларини белгилашдан иборат.

Саммитнинг биринчи сессияси самарали ва мазмунли ўтди. Унда пандемиянинг асоратлари ва унга қарши курашишда ўзаро ҳамкорлик қилиш ва тажриба алмашишга доир етарлича фикр-мулоҳазалар келтириб ўтилди.

Мамлакатларимиз ўртасидаги самимий алоқалар мустаҳкам боғланган. Мазкур саммит орқали юртингиздаги ислоҳотлар ва улкан ўзгаришлардан янада кўпроқ хабардор бўлдик. Шуни ҳам айтиш керакки, Россия ва Ўзбекистон ўртасидаги парламентлараро ҳамкорликни кенгайтиришда бу каби форумларнинг аҳамияти катта. Шу билан бирга бу тадбир Олий Мажлис Сенати ва Қонунчилик палатасининг иш фаолияти билан яқиндан танишиш, ўзаро тажриба алмашиб, эришилган ютуқларни таҳлил этиш имконини ҳам берди. 

Ўзбекистондаги сиёсий жараёнларда хотин-қизларнинг фаоллигини алоҳида эътироф этишни истардим.  Буни Олий Мажлис палаталарида фаолият юритаётган сенатор ва депутат аёлларнинг кўплигидан ҳам кўриш мумкин.
Бугунги анжуман парламент ҳамкорлигини янада кенгайтиришга туртки бўлади, соҳада ҳали қилишимиз керак бўлган ишлар талайгина. Хусусан, хотин-қизлар тадбиркорлигини кенгайтиришда фаоллик кўрсатишимиз зарур. Бунда Ўзбекистон ва  Россия тадбиркор аёлларининг учрашувини ташкил этиш, парламентларимиз ўртасидаги алоқаларни янада ривожлантиришимиз лозим.

Манба